एप्पलले सिरी (Siri) को आर्टिफिसियल इन्टेलिजेन्स (AI) सुविधाहरूका बारेमा ग्राहकलाई भ्रममा पारेको आरोपमा २५ करोड डलर (करीब ३३ अर्ब नेपाली रुपैयाँ) को सम्झौता प्रस्ताव गरेको छ। यस सम्झौता अनुसार योग्य आईफोन प्रयोगकर्ताहरूले प्रति उपकरण ९५ डलरसम्म क्षतिपूर्ति पाउन सक्नेछन्।
क्यालिफोर्नियाको संघीय अदालतमा दायर गरिएको एक सामूहिक मुद्दामा एप्पलले “इन्हान्स्ड सिरी फिचर्स” (Enhanced Siri features) को गलत प्रचार गरेको दाबी गरिएको थियो। उक्त सुविधाहरू आईफोन बिक्री गर्दा उपलब्ध नभएको तर झुठो विज्ञापनका आधारमा मानिसहरूलाई फोन किन्न बाध्य पारेको आरोप एप्पलमाथि लागेको छ। यद्यपि एप्पलले यी आरोपहरू स्वीकार गरेको छैन, तर मुद्दा लम्ब्याउनु भन्दा समाधान गर्नका लागि यो रकम तिर्न सहमत भएको हो।
को-को हुन् योग्य प्रयोगकर्ता?
यस सम्झौता अन्तर्गत अमेरिकामा रहेका लगभग ३ करोड ७० लाख आईफोन प्रयोगकर्ताहरू योग्य हुने अनुमान गरिएको छ। यसमा निम्न सर्तहरू पूरा गर्नेहरू पर्दछन्:
जसले जुन १०, २०२४ देखि मार्च २९, २०२५ को बीचमा आईफोन खरिद गरेका थिए।
खरिद गरिएको मोडेल iPhone 16, iPhone 15 Pro, वा iPhone 15 Pro Max हुनुपर्नेछ।
कति पैसा पाइन्छ?
सुरुमा योग्य ग्राहकहरूले प्रति उपकरण २५ डलर पाउने अनुमान गरिएको छ। तर, कति जनाले दाबी पेश गर्छन् भन्ने आधारमा यो रकम बढ्न सक्छ। अदालतको कागजात अनुसार यो रकम अधिकतम ९५ डलर सम्म पुग्न सक्नेछ।
दाबी कसरी गर्ने?
अहिले नै दाबी पेश गर्ने प्रक्रिया सुरु भइसकेको छैन। यस मुद्दा हेरिरहेको ‘क्लार्कसन ल फर्म’ (Clarkson Law Firm) का अनुसार केही हप्ताभित्र एक आधिकारिक वेबसाइट सार्वजनिक गरिनेछ। योग्य प्रयोगकर्ताहरूलाई इमेल वा चिठ्ठी मार्फत जानकारी दिइनेछ। उक्त वेबसाइटमा गएर प्रयोगकर्ताले आफ्नो विवरण र आईफोनको सिरियल नम्बर राखेर अनलाइन फारम भर्नुपर्नेछ।
