विश्वकप क्वार्टरफाइनलमा आज स्पेन र बेल्जियम भिड्दै

काठमाडौं, असार २६ गते । फिफा विश्वकप २०२६ अन्तर्गत आज हुने क्वार्टरफाइनलमा स्पेन र बेल्जियमबीच प्रतिस्पर्धा हुँदैछ। खेल नेपाली समयअनुसार शनिबार बिहान १२ः४५ बजे अमेरिकाको लस एन्जलसस्थित सोफी स्टेडियममा सुरु हुनेछ।

सेमिफाइनल प्रवेशको लक्ष्यसहित मैदान उत्रने दुवै टोली उत्कृष्ट लयमा रहेका छन्। यस खेलको विजेताले सेमिफाइनलमा यसअघि मोरक्कोलाई २–० ले पराजित गर्दै अन्तिम चारमा स्थान बनाएको फ्रान्ससँग प्रतिस्पर्धा गर्नेछ।

स्पेनले अन्तिम १६ को खेलमा पोर्चुगललाई १–० ले पराजित गर्दै क्वार्टरफाइनल यात्रा तय गरेको हो। प्रतियोगिताभर स्पेनले बल नियन्त्रणमा आधारित खेल शैली, सन्तुलित मिडफिल्ड र बलियो रक्षापंक्तिको प्रदर्शन गर्दै उपाधिको प्रमुख दाबेदारका रूपमा आफूलाई स्थापित गरेको छ।

यता बेल्जियमले अन्तिम १६ मा अमेरिकालाई ४–१ ले हराउँदै अन्तिम आठमा स्थान सुरक्षित गरेको थियो। आक्रामक खेल प्रदर्शन गर्दै आएको बेल्जियम स्पेनविरुद्ध पनि सोही लय कायम राख्ने लक्ष्यमा हुनेछ।

स्पेनका युवा खेलाडी लामिन यामाल, पेड्री र कप्तान रोड्री टोलीका प्रमुख आकर्षण रहने अपेक्षा गरिएको छ। बेल्जियमका अनुभवी मिडफिल्डर केभिन डी ब्रुइनसहित आक्रमण पंक्तिका खेलाडीको प्रदर्शन पनि टोलीको सफलताका लागि निर्णायक बन्न सक्छ।

विश्व फुटबलका दुई बलिया राष्ट्रबीच हुने यस प्रतिस्पर्धालाई प्रतियोगिताकै सबैभन्दा रोमाञ्चक क्वार्टरफाइनलमध्ये एकका रूपमा हेरिएको छ। दुवै टोलीसँग अनुभवी तथा युवा खेलाडीको सन्तुलित संयोजन रहेकाले खेल उच्च प्रतिस्पर्धात्मक हुने अपेक्षा गरिएको छ।

तस्बिर स्रोत: फिफा

काठमाडौँ — नेपालले बलियो प्रतिद्वन्द्वी भारत ‘ए’ विरुद्ध खेल्दै शुक्रबार एसिया कप राइजिङ स्टार्स प्रतियोगिता

काठमाडौँ — फुटबलको सर्वोच्च निकाय फिफाको अध्यक्ष पदमा पुनः निर्वाचित हुन खोजिरहेका जियानी इन्फान्टिनोलाई फ्रान्स

काठमाडौं । उच्च अदालत पाटनका एक न्यायाधीशका व्यक्तिगत सुरक्षा अधिकृत (पीएसओ) ले न्यायाधीशकै निवासभित्र आफैँलाई