न्यु जर्सी (अमेरिका) – स्पेनले फिफा विश्वकप २०२६ को उपाधि जित्दै दोस्रो पटक विश्व फुटबलको शिखरमा आफूलाई स्थापित गरेको छ। आइतबार राति अमेरिकाको मेटलाइफ स्टेडियममा सम्पन्न फाइनलमा स्पेनले साविक विजेता अर्जेन्टिनालाई अतिरिक्त समयमा १–० गोलले पराजित गर्दै विश्वकप ट्रफी उचालेको हो। निर्धारित ९० मिनेटसम्म दुवै टोलीले गोल गर्न नसकेपछि खेल अतिरिक्त समयमा पुगेको थियो। खेलको १०६औँ मिनेटमा मैदान प्रवेश गरेका फरान टोरेसले निर्णायक गोल गर्दै स्पेनलाई ऐतिहासिक जित दिलाए। टोरेसको गोलसँगै स्पेनी समर्थकहरू उत्सवमा डुबेका थिए।
खेलभर स्पेनले बल नियन्त्रण र आक्रमणमा स्पष्ट दबाब बनाए पनि अर्जेन्टिनाका गोलरक्षक एमिलियानो मार्टिनेजले लगातार उत्कृष्ट बचाउ गर्दै टोलीलाई खेलमा टिकाइराखेका थिए। तर अतिरिक्त समयमा टोरेसको प्रहार रोक्न भने उनी असफल भए।लिओनल मेस्सीको नेतृत्वमा लगातार दोस्रो विश्वकप जित्ने लक्ष्यसहित मैदान उत्रिएको अर्जेन्टिनाले अपेक्षित प्रदर्शन गर्न सकेन। स्पेनले उत्कृष्ट संगठित खेल प्रदर्शन गर्दै अर्जेन्टिनाको आक्रमणलाई प्रभावहीन बनायो। सन् २०१० मा पहिलो पटक विश्वकप जितेको स्पेनले १६ वर्षपछि पुनः विश्व फुटबलको सर्वोच्च उपाधि जित्दै नयाँ इतिहास रचेको छ। प्रशिक्षक लुइस डे ला फुएन्तेको नेतृत्वमा स्पेनले प्रतियोगिताभर प्रभावशाली प्रदर्शन गर्दै विश्व च्याम्पियन बन्न सफल भएको हो।
