काठमाडौं — आइसीसी क्रिकेट विश्वकप लिग टु २०२३-२७ मा नेपाली राष्ट्रिय क्रिकेट टिमको सिधा विश्वकप छनोटको यात्रा थप कठिन बन्दै गएको छ। आइसीसी क्रिकेट विश्वकप लिग टुको ११६औं खेलमा नेपाल नामिबियासँग ८ विकेटले पराजित भयो। उट्रेक्टमा खेलिएको खेलमा नेपाल ४६.५ ओभरमा १५७ रनमा सीमित भयो (रोहित पौडेल ३१, जेजे स्मिट ६ विकेट)। जवाफमा नामिबियाले जान फ्रिलिन्कको ७७ रनको सहायताले ३७.४ ओभरमै लक्ष्य पार गर्यो।
यो हारसँगै नेपालको रेकर्ड ११ जित–१६ हार पुगेको छ। टिम हाल अंकतालिकामा पाँचौं स्थानमा छ, जुन सिधा विश्वकप क्वालिफायरमा प्रवेश दिने शीर्ष चारभन्दा तल हो। स्कटलैन्ड, अमेरिका, क्यानडा र नेदरलैन्ड्स हाल अगाडि छन्।
नेपालका बाँकी दुई खेल नामिबिया र नेदरलैन्ड्सविरुद्ध निर्णायक हुनेछन्। दुवैमा जित्नैपर्ने अवस्थामा नेपाल छ, नत्र सिधा क्वालिफायर प्रवेशको सम्भावना धेरै टाढा पुग्नेछ।
