विराटनगर। कोशी प्रदेशमा नयाँ सरकार गठनका सम्बन्धमा एमाले अध्यक्ष केपी शर्मा ओली र प्रदेशका मुख्यमन्त्री हिक्मतकुमार कार्कीबीच भएको छलफल निष्कर्षविहीन टुङ्गिएको नेताहरूले बताएका छन्।
भक्तपुरको गुण्डुस्थित अध्यक्ष ओलीको निवासमा भएको बैठकमा प्रदेश मुख्यमन्त्री कार्कीका साथै एमाले कोशीका अध्यक्ष घनश्याम खतिवडा र सचिव राजकुमार भण्डारी सहभागी थिए। बैठक सकिएको र कुनै निर्देशन जारी नभएको जानकारी सचिव भण्डारीले दिएका छन्। “बैठक सकिएको छ। कुनै निर्देशन जारी भएको छैन। उपयुक्त समयमा निर्देशन दिने उहाँ (अध्यक्ष ओली)ले बताउनुभएको छ,” अध्यक्ष ओलीको भनाइ उद्धृत गर्दै भण्डारीले भने।
मुख्यमन्त्री कार्कीनजिक मानिने एमाले कोशी प्रदेश सांसद रेवतीरमण भण्डारीले पनि अहिलेसम्म कुनै स्पष्ट सन्देश नआएको बताए। “छलफल सकिए पनि ठोस कुरा केही ननिस्किएको बुझिएको छ,” भण्डारीले भने। कोशी प्रदेश सरकारका मुख्यमन्त्री हिक्मतकुमार कार्की र एमाले अध्यक्ष केपी शर्मा ओलीबीच मङ्गलबार साँझ पनि अङ्कमाल/अकेला (वान-अन-वान) वार्ता भएको थियो। सो बैठकमा ओलीले धेरै कुरा नभनी कार्कीका भनाइ मात्र सुनेका थिए।
मङ्गलबार मुख्यमन्त्री कार्कीलाई भेट्नुअघि ओलीले एमाले कोशी प्रदेश अध्यक्ष घनश्याम खतिवडा र सचिव राजकुमार भण्डारीसँग ब्रिफिङ लिएका थिए। उनीहरूसँगको बैठकमा ओलीले नेतृत्व परिवर्तनबारे सोच्नुपर्ने बताएका थिए। “अध्यक्षज्यूसँग बैठक भयो। यो समयमा नेतृत्व परिवर्तन गरेर अघि बढ्दा राम्रो हुन्छ भन्ने उहाँको आशय थियो,” एमाले कोशीका अध्यक्ष घनश्याम खतिवडाले भने, “हामीले कोशी प्रदेशका सांसदहरूले दिएका सुझाव र वस्तुस्थितिबारे जानकारी गरायौँ। उहाँले म मुख्यमन्त्रीसँग कुरा गर्छु, तपाईँहरूले राजनीतिक निर्देशन पाउनुहुनेछ भन्नुभयो।”
बुधबारको बैठकमा मुख्यमन्त्री कार्की, खतिवडा र भण्डारीसँगको सामूहिक छलफलपछि ओलीले मुख्यमन्त्रीबाहेक अन्य दुई नेतासँग केही बेर बेग्लै छलफल गरेका थिए। तर, सो क्रममा के कुरा भयो भन्नेबारे नेताहरूले स्पष्ट पारेका छैनन्।
अध्यक्ष ओली संसदीय दलका उपनेता तिलकुमार मेन्याङ्बोलाई मुख्यमन्त्री बनाउन कसरत गरिरहेका छन्। पार्टी सचिव तथा प्रदेश इन्चार्ज शेर्धन राई स्वयं मेन्याङ्बोको पक्षमा बहुमत जुटाउन लागिपरेका छन्। संविधानको धारा १६८ (५) अनुसार सरकार गठन भएकाले मुख्यमन्त्रीलाई हटाउन भने सहज छैन। पार्टीको आधिकारिक निर्णय नआएसम्म राजीनामा नदिने अडान कार्कीले लिएपछि एमाले संसदीय दलमा हस्ताक्षर अभियान सुरु भएको छ।
अध्यक्ष केपी शर्मा ओलीसँग छलफल गर्न राजधानी काठमाडौँ जाने सहमति सोमबार विराटनगरस्थित एमाले कार्यालयमा बसेको प्रदेश पदाधिकारी र संसदीय दलको बैठकमा भएको थियो।
सौजन्य: www.english.ratopati.com
