गोरखा बाढीले प्रहरी चौकीसहितको बस्तीमा नै सम्पर्क टुट्यो, दुई पुल र दुई जलविद्युत् आयोजना बगे

गोरखाको चुमनुब्री गाउँपालिका ४ नाम्रुङस्थिति बूढीगण्डकी र थोराङ खेलामा आएको बाढीले नाम्रुङ बस्तीलाई सडक सञ्जालबाट सम्पर्कविहीन बनाएको छ । बाढीले दुईवटा पुल र दुई जलविद्युत् आयोजना बगाएको छ ।  वडाध्यक्ष पेमा ग्लाल्पो लामाका अनुसार वडा नम्बर दुईको नाम्रुङ बस्तीमा ४० घर र प्रहरी चौकी समेत सम्पर्कविहीन भएको छ । ‘टेलिफोनको टावर पनि बेलाबेलामा सम्पर्क हुन्छ । हामी वैकल्पिक बाटो कता हुन्छ भनेर हेर्न फिल्डमा छौँ,’ उनले शिलापत्रसँग भने ।
गाउँमा रहेको माइक्रो हाइड्रोपावर र पहिलेदेखि बालिरहेको २२ किलोवाटको जलविद्युत् परियोजना बगाएको छ । वडाध्यक्ष लामाका अनुसार सोलारबाट बत्ति जडान गर्न आवश्यक उपकरणको लागि समन्वय भइरहेको छ ।  बिहान ३ बजे पहिरो गएको र पहिरोले नदी थुनिएर बाढी आएको हो । बस्तीको चार घरमा बस्न नमिल्ने गरेर क्षति पुर्‍याएको छ । राहतको लागि वडा नम्बर २ र ४ को समन्वय भइरहेको छ ।