काठमाडौँ/नुवाकोट। रसुवाको भोटेकोशीमा आएको विनाशकारी बाढीले पक्की पुल बगाएपछि ठप्प बनेको नुवाकोटको देवीघाट क्षेत्रमा नेपाली सेनाले ५ दिन अगाडि सुरु गरेको ‘एक्रो ब्रिज’ (Acrow Bridge) जडानको कार्य सफलतापूर्वक सम्पन्न गरेको छ।पुल ढलेपछि यातायात सम्पर्क विच्छेद भई समस्यामा परेका सर्वसाधारणका लागि नेपाली सेनाको प्राविधिक तथा निर्माण टोलीले दिनरात निरन्तर खटिएर छोटो समयमै पुल जडानको काम पूरा गरेको हो।
यातायात सञ्चालन तालिका र स्थानीयलाई राहत:
- पैदलयात्री र सवारी सञ्चालन:
- भोलि (शुक्रबार) देखि: पैदल यात्रीहरूका लागि आवतजावत पूर्ण रूपमा खुला गरिनेछ।
- पर्सि (शनिबार) देखि: हलुका तथा भारी सवारी साधनहरूसमेत नयाँ पुलबाट सञ्चालनमा ल्याइनेछ।
- यातायात सम्पर्क पुनः जोडियो:
भोटेकोशीको बाढीले पक्की पुल बगाएपछि नुवाकोट र आसपासका क्षेत्रको सडक सम्पर्क विच्छेद भई खाद्यान्न तथा अत्यावश्यकीय सामग्री ढुवानीमा ठूलो सकस भएको थियो।
सेनाले छोटो समयमै ‘एक्रो ब्रिज’ जडान गरी सडक सञ्जाल पुनः जोडेपछि स्थानीयवासी, व्यापारी तथा यात्रुहरूले ठूलो राहतको अनुभूति गरेका छन्।


