एजेन्सी । इरानसँग जारी युद्धमा अमेरिकी सेनाको खर्च बढेर ४३ अर्ब ६० करोड अमेरिकी डलर पुगेको छ। अमेरिकी सेन्ट्रल कमान्डले अमेरिकी सांसदहरूलाई उपलब्ध गराएको पछिल्लो अनुमानअनुसार सेप्टेम्बर ३ सम्म युद्धसम्बन्धी अमेरिकी सैन्य खर्च उक्त रकम पुगेको हो। अमेरिका र इजरायलले फेब्रुअरी २८ मा इरानविरुद्ध सैन्य कारबाही सुरु गरेयता युद्धको आर्थिक भार निरन्तर बढिरहेको छ। यसअघि अमेरिकी कंग्रेसनल बजेट कार्यालयले अगस्ट १ सम्म ३८ अर्ब डलर खर्च भएको अनुमान गरेको थियो।
हतियारमा मात्रै २८ अर्ब १० करोड डलर
पछिल्लो विवरणअनुसार कुल खर्चमध्ये सबैभन्दा ठूलो हिस्सा हतियार तथा क्षेप्यास्त्रमा भएको छ। हतियारमा मात्रै २८ अर्ब १० करोड डलर खर्च भएको अनुमान छ। अगस्ट १ सम्मको अनुमानमा हतियारका लागि २१ अर्ब ७० करोड डलर खर्च भएको थियो। पछिल्लो अनुमानअनुसार यो रकम ६ अर्ब ४० करोड डलरले बढेको हो। विशेषगरी प्याट्रियट र थाडजस्ता क्षेप्यास्त्र प्रतिरक्षा प्रणालीका क्षेप्यास्त्रको प्रयोग बढ्दा अमेरिकी सैन्य भण्डारमा समेत दबाब परेको बताइएको छ।
युद्ध सञ्चालन र क्षतिको लागत
अमेरिकी सेनाले सांसदहरूलाई दिएको विवरणमा युद्धपोत, विमान तथा सैन्य अखडाको सञ्चालन खर्चसँगै क्षतिग्रस्त वा नष्ट भएका सैन्य उपकरण र घाइते सैनिकको उपचारमा लाग्ने खर्चसमेत समेटिएको छ। तर मध्यपूर्वस्थित अमेरिकी सैन्य अखडामा इरानी आक्रमणबाट भएको सम्पूर्ण भौतिक क्षतिको लागत भने ४३ अर्ब ६० करोड डलरको अनुमानमा समावेश गरिएको छैन। अमेरिकी रक्षा मन्त्रालयका महानिरीक्षकको प्रतिवेदनअनुसार कुवेत, बहराइन, कतार, संयुक्त अरब इमिरेट्स, साउदी अरब, इराक, ओमान र जोर्डनस्थित अमेरिकी सैन्य संरचनामा इरानी क्षेप्यास्त्र तथा ड्रोन आक्रमणबाट क्षति पुगेको छ।
१८ अमेरिकी सैनिकको मृत्यु
अमेरिकी रक्षा मन्त्रालयको तथ्यांकअनुसार युद्धका क्रममा हालसम्म १८ अमेरिकी सैनिकको मृत्यु भएको छ भने ८३० भन्दा बढी घाइते भएका छन्। थप ९५ अर्ब डलर बजेट माग युद्धको खर्च बढ्दै गएपछि अमेरिकी प्रशासनले सैन्य तथा युद्धसम्बन्धी खर्च व्यवस्थापनका लागि संसद्सँग ९५ अर्ब अमेरिकी डलरको थप बजेट प्याकेज माग गरेको छ। यसैबीच आगामी वर्षका लागि १.५ ट्रिलियन अमेरिकी डलरको सैन्य बजेट प्रस्ताव गरिएको छ।
युद्धको असर विश्व अर्थतन्त्रमा
इरान युद्धको प्रभाव अमेरिकी सैन्य खर्चमा मात्र सीमित छैन। युद्धका कारण तेलको मूल्य, अन्तर्राष्ट्रिय बजार तथा क्षेत्रीय व्यापारमा समेत असर परेको छ। विशेषगरी होर्मुज जलडमरूमध्य र लाल सागर हुँदै हुने ऊर्जा तथा व्यापारिक ढुवानीमा अवरोध उत्पन्न हुँदा विश्व अर्थतन्त्रमा थप दबाब पर्न सक्ने अमेरिकी कंग्रेसनल बजेट कार्यालयले जनाएको छ। कार्यालयका अनुसार ऊर्जा ढुवानीमा आएको अवरोधले आगामी वर्षको सुरुआती महिनासम्म अमेरिकी मुद्रास्फीतिमा समेत प्रभाव पार्न सक्छ। युद्धको तीव्रता कायम रहेमा अमेरिकी सैन्य खर्च हरेक महिना करिब ३ अर्ब डलर वा त्यसभन्दा बढी थपिन सक्ने अनुमान गरिएको छ। त्यसैले युद्ध लम्बिँदै जाँदा अमेरिकी सरकारमाथिको आर्थिक भार अझ बढ्न सक्ने देखिन्छ।
