काठमाडौं । सडक डिभिजन इलामले लामो समयदेखि अलपत्र अवस्थामा रहेको सुखानी पक्की पुलको ठेक्का अन्त गरेको छ ।
मेची कोरिडोर (मदन भण्डारी राजमार्ग) अन्तर्गत इलाममा पर्ने १ करोड ६२ लाख रुपैयाँ लागतको उक्त पुल निर्माणका लागि १४ वर्ष ४ महिनाअघि सम्झौता भए पनि विगत ११ वर्षदेखि काम पूर्ण रूपमा ठप्प पारिएको थियो ।
लामो समयसम्म सम्झौता अनुसारको काम नगरी कार्यस्थल छाडेर भाग्ने निर्माण व्यवसायी स्काई–अजम्वर–शिवराम जेभी, काठमाडौंलाई कालोसूचीमा राख्न सिफारिस गरिएको डिभिजनले जनाएको छ । साथै खरिद कानुनबमोजिम थप कारबाहीको प्रक्रिया पनि अघि बढाइएको छ ।
अब कुनै पनि योजनालाई अनिर्णयको बन्दी बन्न नदिने र ठेकेदारले जिम्मेवारी पूरा नगरे सरकारी निकाय आफैँ अघि सरेर दायित्व पुरा गर्ने प्रतिबद्धता डिभिजनले व्यक्त गरेको छ ।



