काठमाडौं । अमेरिकामा श्रीमती ममता काफ्लेको हत्या अभियोगमा मुद्दा खेपिरहेका नेपाली मूलका नरेश भट्टले श्रीमतीको शव टुक्राटुक्रा पारेर फालेको स्वीकार गरेका छन् । तर, उनले श्रीमतीले आत्महत्या गरेको र आफूले केवल शवको मात्र व्यवस्थापन गरेको दाबी गरेका छन् ।
अमेरिकाको भर्जिनियास्थित मनासस पार्कमा दुई वर्षअघि बेपत्ता भएकी ममताको शव अझै फेला पर्न सकेको छैन । बिहीबार अदालतमा बयान दिने क्रममा भट्टले सन् २०२४ जुलाई ३० को बिहान श्रीमतीलाई बेडरुमको भुइँमा मृत अवस्थामा फेला पारेको बताएका छन् ।
उनका अनुसार ममताको शरीर र भुइँमा बान्ता थियो भने नजिकै औषधिका चक्की र विषादीका खुला प्याकेट पनि थिए । उनले ममतालाई करिब ४५ मिनेटदेखि एक घण्टासम्म बचाउने प्रयास गरे पनि सफल नभएको दाबी गरेका छन् ।
प्रहरीलाई खबर नगर्नुको कारण आफू चरम डर र तनावमा परेको भट्टको भनाइ छ । त्यसपछि छोरीलाई बेबीसिटरको जिम्मा लगाएर शव लुकाउने सामग्री खरिद गर्न होम डिपो गएको र घर फर्किएपछि आराले शव टुक्राटुक्रा पारी घरकै फोहोर फाल्ने डस्टबिनमा हालेको उनले बयान दिएका छन्। तर, उनले फोहोरमा फालिएका झोलाहरूमा ममताका व्यक्तिगत सामान मात्र रहेको र शवका अवशेष नरहेको दाबीसमेत गरेका छन् ।
यता, अभियोजन पक्षले भने भट्टको बयानमाथि गम्भीर प्रश्न उठाएको छ। यसअघि प्रहरी र सञ्चारमाध्यमसँग ममता घर छाडेर गएको तथा न्यूयोर्क वा टेक्सास पुगेको हुन सक्ने दाबी गर्दै आएका भट्टले अहिले आएर बयान फेरेको अभियोजन पक्षको भनाइ छ ।
नरेश भट्टमाथि प्रथम श्रेणीको हत्या, मृत शरीरको अपमान तथा शव लुकाएको अभियोग लगाइएको छ। हत्याको अभियोगमा भने उनले आफू निर्दोष रहेको दाबी गर्दै आएका छन् ।


