चितवन । राष्ट्रिय स्वतन्त्र पार्टी (रास्वपा) का सभापति रवि लामिछानेले नारायणी नदीको कटानबाट जोखिममा परेको बजार क्षेत्र जोगाउन तत्काल र दीर्घकालीन योजना बनाएर अघि बढ्ने बताएका छन् ।
नारायणी नदीले कटान गरेको क्षेत्रको निरीक्षणपछि उद्योग वाणिज्य संघ चितवनमा आयोजित सरोकारवालासँगको छलफलमा उनले नागरिकको ज्यान, बजारको अस्तित्व, ऐतिहासिक महत्व र व्यवसायीको सम्पत्ति जोगाउनु पहिलो प्राथमिकता भएको बताए ।
लामिछानेले बजार क्षेत्रको जोखिमबारे जानकारी पाएपछि सम्बन्धित निकायलाई खबर गरी आवश्यक अध्ययनका लागि टोली परिचालन गरिएको जानकारी दिए । तत्काल गर्नुपर्ने काम र दीर्घकालीन समाधानका उपाय समेटेर योजना बनाइने उनको भनाइ थियो ।
प्राविधिक अध्ययनले बजार क्षेत्र स्थानान्तरण गर्नुपर्ने देखाएमा सबै सरोकारवालाको सहमतिमा निर्णय लिनुपर्ने उनले बताए ।
‘जनता जोगाउनका लागि बजेट दोस्रो कुरा हो। जनतालाई कसरी जोगाउन सकिन्छ भन्ने पहिलो प्राथमिकता हो,’ लामिछानेले भने ।
उनले चितवन आफ्नो निर्वाचन क्षेत्र भएकै कारण विशेष प्राथमिकता नदिइने स्पष्ट पार्दै देशभर बाढीपहिरोबाट प्रभावित क्षेत्रको आवश्यकता र क्षतिका आधारमा राज्यले स्रोतसाधन परिचालन गर्नुपर्ने बताए ।
अध्ययनबाट पहिचान भएका योजनाका लागि स्रोत सुनिश्चित गर्न पहल गर्ने प्रतिबद्धता पनि उनले जनाए ।
छलफलमा उद्योग वाणिज्य संघ चितवनका अध्यक्ष चिरञ्जीवी सुवेदीले नारायणी नदी कटानको समस्या दीर्घकालीन रूपमा समाधान हुने गरी योजना बनाउन आग्रह गरेका थिए ।


