वासिङ्टन, असार ३१ गते (एजेन्सी)। संयुक्त राज्य अमेरिकाका राष्ट्रपति डोनाल्ड ट्रम्पले इरान सम्झौतामा नआएसम्म अमेरिकी सैन्य कारबाही जारी रहने बताउनुभएको छ। अमेरिकी सञ्चारमाध्यम फक्स न्युजको कार्यक्रम ‘स्पेसल रिपोर्ट’ (Special Report) मा पत्रकार ट्रे यिङ्स्टसँगको अन्तर्वार्तामा उहाँले इरानमाथिको दबाबलाई निरन्तरता दिने स्पष्ट पार्नुभयो।
अन्तर्वार्ताका क्रममा राष्ट्रपति ट्रम्पले “इरानले सम्झौता नगरेसम्म आक्रमण जारी रहनेछ” भन्दै सैन्य कारबाही तत्काल रोक्ने कुनै योजना नरहेको बताउनुभयो। उहाँले “उनीहरू (इरान) ले सम्झौता गर्नैपर्छ। शक्ति प्रदर्शनमार्फत मात्र उनीहरूलाई वार्ताको टेबलमा ल्याउन सकिन्छ” भन्ने धारणा पनि व्यक्त गर्नुभयो।
ट्रम्पले आवश्यक परे अमेरिकाले इरानका थप रणनीतिक पूर्वाधारमाथि पनि आक्रमण गर्न सक्ने चेतावनी दिनुभयो। उहाँले इरान वार्तामा फर्किए तनाव कम गर्न सकिने संकेत दिँदै कूटनीतिक समाधानका लागि तेहरानले आफ्नो अडान परिवर्तन गर्नुपर्ने बताउनुभयो।
अन्तर्वार्तामा ट्रम्पले अमेरिकी प्रशासनको उद्देश्य युद्धलाई लम्ब्याउनु नभई इरानलाई सम्झौतामा ल्याउनु रहेको दाबी गर्नुभयो। उहाँले अमेरिकाले राष्ट्रिय सुरक्षा र क्षेत्रीय स्थायित्वलाई ध्यानमा राखेर आवश्यक निर्णय लिने उल्लेख गर्नुभयो।
पछिल्ला दिनमा अमेरिका–इरानबीच सैन्य तनाव बढिरहेका बेला ट्रम्पको उक्त अभिव्यक्तिलाई द्विपक्षीय सम्बन्ध थप तनावपूर्ण बन्न सक्ने सङ्केतका रूपमा विश्लेषण गरिएको छ। यस घटनाक्रमले मध्यपूर्वको सुरक्षा अवस्था, अन्तर्राष्ट्रिय कूटनीति तथा विश्व ऊर्जा बजारमा समेत चासो बढाएको छ।


