टोकियो, २९ जुलाई — जापानको दक्षिणी क्युसु टापुस्थित कुमामोतो प्रान्तमा मंगलबार आएको शक्तिशाली भूकम्पले ठूलो क्षति पुर्याएको छ। जापान मौसमविज्ञान एजेन्सी (जेएमए) का अनुसार मंगलबार साँझ ४ बजी २७ मिनेटमा (स्थानीय समय) रिक्टर स्केलमा ६.८ म्याग्निच्युडको (जेएमए म्याग्निच्युड ७.१) भूकम्प गएको हो, जसको केन्द्रबिन्दु जमिनमुनि करिब १० किलोमिटर गहिराइमा रहेको थियो। एजेन्सीले यस भूकम्पलाई आधिकारिक रूपमा “रेइवा ८ कुमामोतो भूकम्प” नाम दिएको छ।
१४ जनाको मृत्यु, थुप्रै बेपत्ता
जापानका प्रधानमन्त्री सानाए ताकाइचीका अनुसार भूकम्पका कारण हालसम्म कम्तीमा १४ जनाको मृत्यु भइसकेको छ भने थुप्रैको अवस्था अझै अज्ञात छ। भूकम्पका कारण कुमामोतो प्रान्तका करिब ३ लाख नागरिकलाई सुरक्षित स्थानमा सर्न निर्देशन दिइएको थियो। भूकम्पले क्षेत्रका थुप्रै संरचनाहरूलाई क्षति पुर्याएको छ, जसमध्ये कासिमास्थित एउटा ठूलो सपिङ मल पनि आंशिक रूपमा भत्किएको छ।
सपिङ मलमा विस्फोट, उद्धार कार्य जारी
काशिमामा रहेको उक्त सपिङ मलमा ग्यास चुहावटका कारण विस्फोट भएको आशंका गरिएको छ, जसमा धेरैको मृत्यु भएको र तीन जना अझै बेपत्ता रहेको सीएनएनको प्रतिवेदनमा उल्लेख छ। घटनास्थलनजिकै बस्ने एक महिलाले उक्त विस्फोट “डरलाग्दो गरी ठूलो आवाजको” थियो भनी बताएकी छन्।
सुनामी सतर्कता जारी गरी पछि हटाइयो
भूकम्पपछि जापान मौसमविज्ञान एजेन्सीले अरियाके र यात्सुसिरो सागरतर्फ सुनामी सतर्कता जारी गरेको थियो, जुन पछि सोही दिन हटाइयो। अधिकारीहरूका अनुसार भूकम्पको तीव्रता जापानको भूकम्पीय मापन प्रणालीको उच्चतम तहमा पुगेको थियो।
राहत तथा उद्धार परिचालन
जापान सरकारले आपत्कालीन विपद् प्रतिकार्य टास्कफोर्स गठन गरेको छ भने आत्मरक्षा बलका करिब ३ हजार ६ सय सैनिक उद्धार तथा राहत कार्यका लागि परिचालन गरिएका छन्। प्रधानमन्त्री ताकाइचीले “हरेक क्षण महत्त्वपूर्ण छ” भन्दै बेपत्ता र फसेकाहरूको खोजी तीव्र पारिएको जनाएकी छन्। भूकम्पका कारण कुमामोतो विमानस्थलमा केही समयका लागि उडान सेवा निलम्बन गरिएको थियो। जापानको आणविक नियमन प्राधिकरणले भने आणविक प्रतिष्ठानहरूमा कुनै असामान्य अवस्था नरहेको जनाएको छ।
थप भूकम्पको सम्भावना
विज्ञहरूका अनुसार भूकम्पको केन्द्रबिन्दु उथलो रहेकाले आगामी दिनहरूमा थप शक्तिशाली भूकम्प आउने सम्भावना रहेको छ। कुमामोतो प्रान्त जापानको सबैभन्दा लामो सक्रिय भ्रंश प्रणाली रहेको “जापान मेडियन टेक्टोनिक लाइन” को दक्षिणी छेउमा पर्छ, जहाँ हिनागु र फुतागावा नामक दुई भ्रंशहरूले यस भूकम्पलाई जन्माएका थिए।
छिमेकी मुलुकमा समेत झट्का महसुस
यस भूकम्पको प्रभाव जापानबाहिर दक्षिण कोरियाका बुसान, जेजु र इन्चोनसम्म पनि महसुस भएको थियो, जहाँ केही स्थानीयवासी सुरक्षाका लागि घरबाट बाहिरिएका थिए।
तस्बिर स्रोत: रोयटर्स
