काठमाडौं । राष्ट्रिय स्वतन्त्र पार्टी (रास्वपा)का सभापति रवि लामिछानेले धार्मिक समुदायका अगुवाहरूसँग छलफल गरेका छन् ।
धार्मिक हिंसा भड्किएपछि सामाजिक सद्भाव कायम राख्ने उद्देश्यले सभापति लामिछानेले धार्मिक समुदायका अगुवाहरूसँग छलफल गरेका हुन् ।
छलफलमा विश्व हिन्दू महासंघका महासचिव रामचन्द्र तिवारी, सचिवालय सदस्य राजुराज फुयाल, मौलाना नरुल हुसेन र मौलाना मोहम्मद खालिद सहभागी थिए ।
छलफलपछि उनीहरूले रविको अगाडि मिलाए हात मिलाएर एकताको सन्देश दिएका छन्।
रविले छलफलमा दुवै संस्थाबाट संयुक्त वक्तव्य निकाल्न आग्रह गरे ।
उनले भने, ‘यहीँ बसेर बनाऔँ, यहीँबाट सन्देश दिऊँ। हामी यहीँ ड्राफ्ट गरौँ। यहाँहरू यदि सहमत हुनुहुन्छ भने श्रेय जसले पाए पनि फरक पर्दैन। यो श्रेय प्राप्त गर्ने दौडमा हामी छैनौँ। म त बिल्कुलै छैन। हामी जिम्मेवारी पुरा गर्न आएका हौँ।’
उनले नागरिकको धन–जन जोगाउनको लागि एकताबद्ध हुनुपर्ने बताए।
उनले थपे, ‘अलिकति पनि ढिला गर्‍यौँ भने त्यसले अर्को विध्वंस निम्त्याउन सक्छ। हाम्रा भाइ-भतिजाहरू लडिरहेका छन्, घेरिएका छन्, तड्पिएर हिँडिरहेका छन्। जसले जुन उद्देश्यले यो आगो झोसेको भए पनि यो आगोले डढाउने हाम्रै घर हो। तर त्यो सल्किँदै आउने त यहीँ हो।’
