काठमाडौं । नेपाल फार्मेसी परिषद् सदस्य नियुक्तिका लागि अघि बढाइएको प्रक्रियाप्रति नेपाल फार्मेसी संघले आपत्ति जनाएको छ । अन्तिम नामावली प्रकाशन गरी उम्मेदवारहरूको अन्तर्वार्तासमेत सम्पन्न भइसकेपछि ‘भुलवश छुटेको’ भन्दै नयाँ उम्मेदवार थपेर पुनः अन्तर्वार्ताका लागि बोलाइएको भन्दै संघले प्रक्रियाको पारदर्शिता र कानुनी आधारबारे प्रश्न उठाएको हो ।
स्वास्थ्य तथा खाद्य स्वच्छता मन्त्रालयले नेपाल फार्मेसी परिषद्का चार सदस्य नियुक्तिका लागि २०८३ भदौ १ गते आवेदन मागेको थियो । प्राप्त आवेदनमध्ये भदौ १७ गते अन्तिम नामावली प्रकाशन गरी भदौ १८ गते उम्मेदवारहरूको अन्तर्वार्ता लिइएको थियो । तर, उक्त अन्तर्वार्ताको नतिजा सार्वजनिक नगरी २१ दिनपछि असोज ८ गते पुनः केही नयाँ व्यक्ति तथा संस्थालाई समावेश गरी अन्तर्वार्ताका लागि सूचना प्रकाशित गरिएको संघले जनाएको छ ।
संघले ‘भुलवश छुटेको’ भन्ने आधारमा अन्तिम नामावली प्रकाशन र अन्तर्वार्ता सम्पन्न भइसकेपछि नयाँ उम्मेदवार थपिएको विषयको कानुनी आधार र प्रक्रिया स्पष्ट पार्न माग गरेको छ । थपिएका उम्मेदवारहरूको अन्तर्वार्ता सोमबार दिउँसो १ बजेका लागि तोकिएको छ ।
यसैबीच, संघले नेपाल फार्मेसी परिषद्का अध्यक्ष डा. कादिर आलमको विगतको सदस्य नियुक्तिसँग सम्बन्धित विषयमा समेत छानबिनको माग गरेको छ । उपलब्ध सार्वजनिक विवरणअनुसार डा. आलम हाल नेपाल फार्मेसी परिषद्का अध्यक्ष छन् ।
संघका अनुसार मुस्लिम फार्मासिस्ट एसोसिएसन अफ नेपाल २०८२ जेठ २२ गते दर्ता भएको र त्यसको केही समयपछि डा. आलम परिषद्को सदस्यमा नियुक्त भएको विषयमा यसअघि नै प्रश्न उठेको थियो । संघले उक्त नियुक्तिको प्रक्रिया र संस्थाको भूमिका सम्बन्धमा निष्पक्ष अध्ययन आवश्यक रहेको बताएको छ ।
संघका महासचिव सुवर्णराज पन्तका अनुसार अहिले ‘भुलवश छुटेको’ भन्दै थपिएका उम्मेदवारमध्ये एक जना डा. आलम आबद्ध मुस्लिम फार्मासिस्ट एसोसिएसन नेपालसँग सम्बन्धित व्यक्ति छन् । यही कारण पछिल्लो नियुक्ति प्रक्रियाको निष्पक्षतामाथि थप प्रश्न उठेको उनको भनाइ छ ।
नेपाल फार्मेसी संघले भने कुनै निश्चित व्यक्तिलाई परिषद् सदस्य बनाउनुपर्ने माग आफूहरूको नरहेको स्पष्ट पारेको छ । योग्यता, अनुभव, पेशागत योगदान, संस्थागत क्रियाशीलता र क्षमताका आधारमा पारदर्शी, निष्पक्ष तथा विधिसम्मत ढंगबाट छनोट हुनुपर्ने संघको माग छ ।
संघले विगतमा सत्ता, पहुँच वा प्रभावका आधारमा नियुक्ति हुने गरेको आरोप उठ्दै आएको सन्दर्भमा परिषद् सदस्य नियुक्तिको निर्णय प्रक्रिया पारदर्शी र निष्पक्ष बनाउन मन्त्रालयसँग आग्रह गरेको छ ।
नेपाल फार्मेसी परिषद्को सदस्य नियुक्तिको कानुनी संरचना नेपाल फार्मेसी परिषद् ऐन, २०५७ मा व्यवस्था गरिएको छ । ऐनले परिषद्को गठन तथा विभिन्न सदस्यको योग्यता र नियुक्तिसम्बन्धी व्यवस्था गरेको छ ।
