गृहमन्त्री भएपछि उनको यो पहिलो विदेश भ्रमण हो ।
काठमाडौँ — गृहमन्त्री सुधन गुरुङ भारत प्रस्थान गरेका छन् । भोलिदेखि नयाँ दिल्लीमा हुने बंगालको खाडी बहुक्षेत्रीय प्राविधिक तथा आर्थिक सहयोग पहल (बिमस्टेक) का सदस्य राष्ट्रका गृहमन्त्रीहरूको पहिलो बैठकमा सहभागी हुन उनी सोमबार भारत गएका हुन् । गृहमन्त्री भएपछि उनको यो पहिलो विदेश भ्रमण हो ।
बैठकमा बंगलादेश, भुटान, भारत, म्यान्मार, नेपाल, श्रीलंका र थाइल्यान्ड गरी सात सदस्य राष्ट्रका गृहमन्त्री सहभागी हुनेछन् । गृहमन्त्रीस्तरीय बैठकअघि बिमस्टेक सदस्य राष्ट्रका गृह सचिवहरूको बैठक हुनेछ । सन् १९९७ मा क्षेत्रीय संगठनका रूपमा स्थापना भएको बिमस्टेकमा गृहमन्त्रीहरूको बैठक पहिलोपटक हुन लागेको हो ।
‘विभिन्न समयमा गृह सचिव र राष्ट्रिय सुरक्षा सल्लाहकारहरूको बैठकले सिफारिस गरेका विषयमा गृहमन्त्रीस्तरीय बैठकमा छलफल हुनेछ,’ बैठकबारे जानकार एक अधिकारीले भने । ३०–३१ अगस्ट २०१८ मा काठमाडौंमा भएको चौथो बिमस्टेक शिखर सम्मेलनका क्रममा सदस्य राष्ट्रका नेताहरूले कानुन कार्यान्वयन, गुप्तचर तथा सुरक्षा निकायबीच सहकार्य र समन्वय सुदृढ गर्ने प्रतिबद्धता व्यक्त गरेका थिए ।


