काठमाडौं, २७ वैशाख ।
अर्जेन्टिनी फुटबलका जादुगर लिओनल मेस्सीले अमेरिकी मेजर लिग सकर (MLS) मा पुन: अर्को ठूलो इतिहास रचेका छन्। शनिबार भएको टोरोन्टो एफसी विरुद्धको खेलमा इन्टर मियामीका लागि खेल्दै मेस्सीले एमएलएसको इतिहासमा सबैभन्दा छिटो १०० गोल योगदान (गोल र असिस्ट) पुर्याउने खेलाडीको कीर्तिमान आफ्नो नाममा गरेका छन्। इन्टर मियामीले ४-२ ले जितेको उक्त खेलमा ३८ वर्षीय मेस्सीले एक गोल र दुई असिस्ट गरेका थिए। यससँगै उनले केवल ६४ खेलमा १०० गोल योगदानको कोसेढुङ्गा पार गरेका हुन्। उनले यसअघि टोरोन्टो एफसीका पूर्व खेलाडी सेबास्टियन जियोभिन्कोले ९५ खेलमा बनाएको कीर्तिमानलाई ३१ खेलको ठूलो अन्तरले पछि पारेका छन्।
मेस्सीले जुलाई २०२३ मा इन्टर मियामीमा आबद्ध भएदेखि लिगमा ५९ गोल र ४१ असिस्ट गरिसकेका छन्। सन् २०२४ र २०२५ मा लगातार दुई पटक एमएलएसको मस्ट भ्यालुएबल प्लेयर (MVP) बनेका मेस्सीले यस सिजन पनि आफ्नो लयलाई निरन्तरता दिइरहेका छन्। मेस्सीको यो उपलब्धिले उनलाई एमएलएस इतिहासकै महान् खेलाडीका रूपमा स्थापित गरेको छ। उनीबाहेक १०० गोल योगदान पुर्याउने शीर्ष ५ छिटो खेलाडीहरूको सूची यस्तो छ:लिओनल मेस्सी: ६४ खेल सेबास्टियन जियोभिन्को: ९५ खेल रोबी किन: ९६ खेल कार्लोस भेला: ९८ खेल जोसेफ मार्टिनेज: १०५ खेल इन्टर मियामीका कप्तान मेस्सीले यो कीर्तिमानसँगै क्लबलाई एमएलएस कप, लिग कप र सपोर्टर्स सिल्ड जस्ता उपाधिहरू दिलाउन मुख्य भूमिका खेलिसकेका छन्। उनको यो अविश्वसनीय प्रदर्शनले विश्वभरका फुटबल प्रशंसकहरूलाई पुनः मन्त्रमुग्ध पारेको छ।
