काठमाडौं । सम्पत्ति शुद्धीकरण अनुसन्धान विभागले पूर्वप्रधानन्यायाधीश चोलेन्द्र शमशेर जबरा, उनका निकटस्थ व्यक्ति तथा नातेदारका घरमा छापा मारेको छ ।
विभाग तथा प्रधानमन्त्रीनिकट स्रोतका अनुसार विभागको टोलीले जबरासहित नवराज थपलिया, दीपक तिमल्सिना र नारायण दाहालको घरमा छापा मारेको हो ।
स्रोतका अनुसार, जबराका केही नातेदारको घरमा समेत विभागको टोली पुगेको छ । उनका भाइ प्रभुशमशेर जबरा र ज्वाइँ नाता पर्ने नवीन बस्नेतको घरमा पनि छापा मारिएको स्रोतले जनाएको छ ।
जबराका निकटस्थ व्यक्तिका घरमा छापा मार्ने क्रममा महत्त्वपूर्ण कागजातहरू बरामद गरिएको बताइएको छ ।
केही दिनअघि मात्रै काठमाडौं उपत्यका अपराध अनुसन्धान कार्यालयको टोलीले जबरालाई उनकै घरबाट मध्यराति पक्राउ गरेको थियो । उनलाई करिब १२ घण्टा नियन्त्रणमा राखेर छाडिएको थियो ।


